Aqmescit rayonınıñ Trudovoye köyünde birinci rusiyeli bala bağçasını quracaqlar.
Qırım.Aqiqat mühbiriniñ malümatına köre, avgust 15 künü abide taşınıñ qoyuv tedbiri keçirildi. Bugünden Qırımda birinci rusiyeli bala bağçasınıñ qurucılığı başlana.
Tedbirge Rusiye Federatsiyasınıñ prezidenti Vladimir Putin ve baş naziri Dmitriy Medvedev davetli ediler. Yerli sakinler olarnı sabırsızlıqnen bekley edi, amma olar qoşulmadılar.
Bala bağçasınıñ qurucılığına tahminen 108 mln ruble ayırılğan edi.
Yañı bala bağçasında 160 yer olacaq ve o şuranıñ dört mesken yerine hızmet etecek: Trudovoye, Akropolis, Ana-Yurt köyleri ve Aykavan qasabası.
«Bundan da ğayrı, Mamaq (Stroganovka), Suin Acı (Denisovka), Cañatay (İvanovka), Cafer Berdi (Drujnoye), Bura (Lazarevka) köylerinden balalarnıñ araba ile taşuv imkâniyeti bar»,– dedi Trudovoye köy şurasınıñ reisi İgor Sazonov.
Bala bağçasınıñ qurucılığı 2015 senesi avgust ayına qadar bitmeli.
