Link açıqlığı

Putin Cemilev ve Çubarovnıñ Qırımğa kiriş yasaqlığı aqqında sualge doğrudan-doğru cevap bermedi


Rusiye prezidenti Vladimir Putin Qırımda medeniyet erbapları ile körüşüvde Qırımğa Mustafa Cemilev ve Refat Çubarovnıñ kiriş yasağı aqqında sualge doğrudan-doğru cevap bermedi.

İşbu yasaqqa şikâyet etken Bağçasaray tarihiy-medeniy qoruğınıñ müdiri Elmira Ablâlimovanıñ çıqışından soñ, Putin böyle dedi: «Biz Rusiye halqlarına eyilikni istegen er kesnen çalışacaqmız, şu cümleden Qırımda yaşağan qırımtatar halqınen de, ve keçmişniñ meselelerinde piar etken ve bunı öz zenaatına çevirgen şahıslar ile iş alıp barmaycaqmız», – dep haber ete İTAR-TASS.

Putin bu kibi yasaqlarnıñ tarafdarı degil de, dialog tarafdarı olğanını bildirdi ve «keçmişniñ problemlerinde mühtekirlik etmeyip, kelecekniñ müsbet yönelişte gurucılığına ıntılmaq kerekligini» de qayd etti.

Bunıñ ile öz çıqışında Rusiye prezidenti Qırımnıñ repressiyalarğa oğrağan halqlarnıñ aqlavı boyunca leyhalarnıñ kenişlevi de ola bilecegini aytıp keçti.

Belli olğanı kibi, Qırımnıñ öz başına tayin etilgen «akimiyeti» Herson vilâyeti Geniçiskte keçirilgen toplaşuvdan qaytqan qırımtatar milliy Meclisiniñ reisi Refat Çubarovnı yarımadağa kirsetmedi.

İyül 5 künü Rusiye Federatsiyası qırımtatar milliy Meclis reisi Refat Çubarovğa öz territoriyasına kirişini 5 yılğa yasaq etti. Evel aynı böyle yasaq qırımtatar halqınıñ yetekçisi Mustafa Cemilevge de berilgen edi.

XS
SM
MD
LG