ATR qırımtatar telekanalı öz seyircilerine aktsiyalarnıñ bir qısmını satın alıp, «ATR grupp» açıq isse senetli teşkilâtnıñ saipdeşi olmağa teklif ete.
Bunı Telekritika bildire.
İssedarlar sırasına Rusiye ya da Ukraina vatandaşları qoşula bile. Bir aktsiya 1000 ruble (363,29 grn.) tura. Umumen ise teleşirket 150 biñ aktsiyanı satmağa azır, bu ise tahminen 55 million grivnanı teşkil ete.
«Bu kanalnıñ satuvı degildir. Ögümizde eki maqsat bar: birinci ve eñ müimi – «imaye yastığı», (akimiyetniñ, – muar.) issedarlarnıñ taqımına köre, bir saipnen «iş körmek» daa da qolay. Şunıñ içün biz telekanal seyircilerine bizge bu uquqiy meseleni çezmege yardım etmege muracaatta bulunamız. Ekinci maqsat – biz nasıldır bir şahısnıñ matbuat vastası olmağanımıznı butün dünyağa köstermek. Biz dünyada yekâne açılğan qırımtatar kanalı olamız», – dedi ATR müdiriniñ muavini Lilâ Bucurova.
ATR yolbaşçılığı büyük paralarnıñ kelecegine ümüt beslemey.
«Bu şaraitlerde kanalımıznıñ kârlı olmaması mümkün olğanını añlaymız. Ve aktsiyalarnıñ satuvından para az olacağını da bilemiz. Bu leyhanı azırlağanda, aktsiyalarnıñ 50% satın almağa azır olğan insan çıqmazmı, dep qasevet çeke edik. Böyle olmaz», – dedi Bucurova.
O şunı da qayd etti ki, aktsiyalarnıñ esas paketi kanalnıñ bugünki saibinde – iş adamı Lenur İslâmovda qalacaq ve yañı issedarlar telekanalnıñ siyasetini deñiştirip olamazlar.
Amma telekanal seyircilerniñ maliye destegine muhtac.
Aktsiyalarnı satın almağa istegenler öz arizalarını 2014 senesi avgust 21 kününe qadar telekanalnıñ adresi boyunca yollay bileler: 295049, Qırım, Aqmescit şeeri, Mamedi Emir-Usein soqağı, 14 ya da saytta arizanıñ elektron şeklini toludra bile.
Avgust 23 künü ATR kanalında «ATR grupp» açıq isse senetli teşkilâtnıñ issedarları ve tesisçileriniñ toplaşuvı keçirilecek. Toplaşuv devamında şirketniñ yolbaşçılıq organları teşkil etilecek. İştirakçilerniñ yanında Rusiye ya da Ukraina pasportları olmalı.
