Link açıqlığı

Qırımda üç tilniñ teñ uquqlılığı olmalı – rus, ukrain ve qırımtatar tilleriniñ, dep bildirdi Rusiye prezidenti Vladimir Putin işğal etilgen Yaltada Devlet Duma deputatları ile keçirilgen körüşüvde.

«Repressiyalarğa oğrağan halqlarnıñ aqlavı boyunca aqiqiy bir iş alıp barılmalı, üç tilniñ teñ uquqlılığı pekitilmeli», – dep bildire Putinniñ sözlerini İTAR-TASS agentligi.

«Qırım Cumhuriyetiniñ Anayasası»nda qayd etilgeni kibi, Qırımda üç til devlet tili olaraq belgilene: rus, ukrain ve qırımtatar. Faqat işbu uquqlar amelge keçirilmey. Misal içün, işğalden soñ, yerli «akimiyet» devlet müessiselerde olğan bütün ukrain yazılarını yoq etmekte.

Qırımnıñ yuqarı sınıflarında qırımtatar tilinde oqutuv de imkânsız eken. Qırım «tasil naziri» Natalya Gonçarova aytqanı kibi, yuqarı sınıflarda talebeler episi bir fenlerni rus tilinde ögrenip, yekâne imtiannı bu tilde tapşırmağa mecbur olacaqlar.

Avgust 13 künü Rusiye Federatsiyasınıñ prezidenti Vladimir Putin Rusiye tarafından işğal etilgen Qırımğa eki künlük iş ziyareti ile keldi. Ukraina İçki işler nazirliginde bu körüşüvni mümkün olmağan bir şey olaraq tanıdılar. Ukraina içki işler nazirliginde ise Putinge qarşı cinaiy işniñ çıqarılmasını tüşüneler.

Çarşenbe künü Putin Aqyarda Rusiye havfsızlıq Şurasınıñ azaları ile toplaşuvnı keçirip, Qırımnıñ havfsızlığı ve qabarcılıq ile küreş kibi meselelerni muzakere etti.

XS
SM
MD
LG