Yalta civarındaki «Mriya» şifahane-kurort kompleksiniñ büyük salonında Rusiye prezidenti Vladimir Putinniñ Rusiye Devlet Duma firqalarınıñ yolbaşçı ve azaları ile körüşüvi başlandı. Mında Rusiye baş naziri, reis Dmitriy Medvedev, Devlet Duma spikeri Sergey Narışkin, federal nazirleri iştirak ete.
Kremlniñ matbuat-hızmeti bergen malümatına köre, körüşüvde «parlamentariyler ile memleketniñ müim meseleleri boyunca açıq subetniñ keçirilmesi beklenile».
Avgust 13 künü Rusiye Federatsiyasınıñ prezidenti Vladimir Putin Rusiye tarafından işğal etilgen Qırımğa eki künlük iş ziyareti ile keldi. Ukraina İçki işler nazirliginde bu körüşüvni mümkün olmağan bir şey olaraq tanıdılar.
Çarşenbe künü Putin Aqyarda Rusiye havfsızlıq Şurasınıñ azaları ile toplaşuvnı keçirip, Qırımnıñ havfsızlığı ve qabarcılıq ile küreş kibi meselelerni muzakere etti.
