İsmail Gasprinskiy Memorial Müzeyinde sentâbr 21-25 künleri İ.Gasprinskiy adına «İsmail Gasprinskiy ve Rusiyeniñ musulman dünyası» serlevalı II Bağçasaray ilim oquvları keçirilecek.
Bunı Bağçasaraynıñ tarihiy-medeniy qoruğınıñ matbuat hızmeti bildire.
Konferentsiyada Rusiye Federatsiyası ve Qırımnıñ devlet akimiyeti organları, Bağçasaray yerli idare organlarınıñ vekilleri, medeniyet ve ilim erbapları iştirak etecek.
Rusiye Federatsiyasınıñ çeşit şeerlerinden taqiqatçılar çıqışta bulunacaq.
Konferentsiya leyhası aşağıdaki yönelişler boyunca toplaşuvlarnıñ keçirilmesini nazarda tuta:
- İsmail Gasprinskiyniñ ömür ve faaliyeti;
- XIX-XX asırlarda türkiy halqlarnıñ neşir ve medeniy faaliyeti, tasil tarihı;
- XIX-XX asırlarda Qırımnıñ içtimaiy-iqtisadiy, medeniy, içtimaiy-siyasiy tarihınıñ müim meseleleri;
- XIX-XX asırlarda Rusiyede musulman tasil tertibatınıñ ilâatı.
Matbuat hızmetiniñ malümatına köre, konferentsiya maqsadı – İ.Gasprinskiyniñ ömür ve faaliyeti ile bağlı olğan taqiqatlarnıñ aktuallaştıruvı, XIX-XX as. Rusiye musulman dünyasınıñ ve Qırımnıñ medeniy ve içtimaiy-iqtisadiy, içtimaiy-siyasiy tarihı meseleleriniñ aydınlatuvıdır.
