Avgust 13 künü Tataristan müftisi, Tataristan Cumhuriyetiniñ musulmanları diniy idaresiniñ reisi Kamil hazrat Samigullin evinde Qırım musulmanları diniy merkeziniñ eyyetini qabul etti.
Bunı Tataristan Cumhuriyetiniñ musulmanları diniy idaresiniñ saytında bildireler.
Tataristanğa yol alğan Qırım eyyetiniñ terkibine Qırım musulmanları diniy merkeziniñ reis muavinleri Ruslan Saitvaliyev ve Timur Bakiyev, em de teşkilâtnıñ matbuat kâtibi Enver Ahmetov kirdi.
«Körüşüv tanıştıruv şeklinde keçti, musafirler Tataristan musulmanları yetekçisine öz teşkilâtınıñ Qırımda alıp barğan faaliyeti aqqında tarif etti ve bir sıra neşirlerni, kitap ve disklerni bağışladılar. Şu cümleden, Kamil hazrat «Miras» gazetası ve «Merhaba» bala medmuası ile tanış oldı», – denile beyanatta.
Körüşüvde söz eki teşkilât arasında işbirlikniñ pekitüvi aqqında yürütile edi. Soñra, Tataristan müftisi Qırım musafirlerine «Huzur» neşriyat evi tarafından basılğan kitaplarnı ediye etti.
«Musulmanlarnıñ diniy merkezi» habaş teşkilâtını işğal etilgen Qırımnıñ akimiyeti qırımtatalar arasında bölünüvni pekitmek içün qullana ve Meclisniñ diniy bölügi sayılğan Qırım musulmanları diniy idaresiniñ yerine ketirmege arekete ete.
