Bu sene Mekkeniñ muqaddes yerlerine acılıqqa barmağa istegen Qırım musulmanları meningokokk yuqunçından aşılavdan keçmek kerekler. Aşılavnı Saudiy Arabistan Qırallığına kirmezden evel eñ azından 10 kün ya da eñ çoq – 3 yıldan evel yapmaq kerek.
Hacılarğa böyle talaplarnı Qırım Cumhuriyeti ve federal emiyeti olğan Aqyar şeeri boyunca qullanıcı aqlarınıñ ve insan amanlığınıñ qoruvı saasında nezaret boyunca Federal hızmetiniñ Regionlarara idaresinde ilân ettiler.
Bundan da ğayrı, Hacğa barmazdan evel, insanlarğa gripp hastalığından aşılav yapmağa tevsiye etile. Qırım Müftiyatı Qırım hacıları içün zaruriy aşılavlarğa arizanı vesiqalarnıñ qabul etüv müddetiniñ bitkeninden soñ teslim etecek.
Vesiqalarnıñ qabul etüvi Qırım musulmanları diniy idaresinde (Aqmescit şeeri, Kurçatov soqağı, 4) 2014 sentâbr 1-ne qadar keçirile. Zaruriy vesiqalarnıñ cedveli Qırım musulmanları diniy idaresiniñ resmiy saytında bar. Hacılıq seferniñ fiyatı – 4 biñ dollar. Qırımdan muqaddes yerlerge çıqış – 2014 senesi sentbâr 25 künü, qaytuv – 2014 senesi oktâbr 10-11 künleri olacaq. Evel alınğan añlaşmağa köre, bu sene Qırım musulmanları diniy idaresi musulmanlarnı Hacqa Ukraina içün ayırılğan yerler boyunca alıp baracaq. Umumen 160 yer bar.
Qayd etmek kerek ki, Acılıqqa er yıl dünyanıñ 160 memleketinden tahminen 2 mln insan bara.
