Çarşenbe künü, avgustnıñ 13-de, Aqyarda Rusiye prezidenti Vladimir Putinniñ, Rusiye ükümetiniñ ve Devlet Duma azalarınıñ ziyareti sebebinden şeerde naqliyat yürüşini ve limanlarnı qapatacaqlar.
Bunı «Aqyar valise vazifelerini eda etken» Sergey Menâylo bildirdi.
«Avgust 13 künü saat 00.00-20.00 arasında Aqyar-Şimaliy, Aqyar-İnkerman içki deñiz yol yürüşi yolcularınıñ oturtuv-endirüv № 146 ve №147 limanları qapatılacaq», – dedi vali
Onıñ malümatına köre, çarşenbe künü saat 00.00-20.00 arasında Aqyar ve Cenübiy körfezde bütün ufaq gemilerniñ areketini sıñırlaycaqlar, bundan da ğayrı Lenin soq., Nahimov caddesi, B.Morskoy – Admiral Oktâbrskiy soqaqlarında naqliyat yürüşi qapatılacaq.
Çarşenbe künü Aqyarda Putin Havfsızlıq Şurasınıñ, avgust 14 künü – Devlet Duma siyasiy firqalarınıñ azaları ile körüşecek.
Evel, Ukraina çetel işler nazirliginde qayd ettiler ki, Rusiye prezidenti Vladimir Putinniñ ve Devlet Duma deputatlarınıñ Rusiye tarafından işğal etilgen Qırımğa kelmek niyetleri mümkün olğan bir şey degildir.
