Qırımtatar halqınıñ yetekçisi, Ukraina halq deputatı Mustafa Cemilev Qırımnıñ öz başına tayin etilgen baş naziri Sergey Aksönovnıñ tefsirini «saçmalıq» olaraq adladı. Aksönov QHA haber agentliginiñ baş tesisçisini Qırımda «milletlerara ziddiyetni doğurmaq ıntıluvında» qabaatladı.
Bunı Mustafa Cemilev avgust 12 künü QHA haber agentligine bergen izaatında ayttı.
«Aytqanları – saçma-sapanlıqtır. Mecliste ukrain bayrağı asıla, misal içün – «milletlerara ziddiyetniñ pekitilmesi» demektir. Bu pek ciddiy bir qabaattır. Bu kibi meseleler mahkemede baqıla – deliller ögrenile, taraflar çıqışta buluna, bir kimse bunı öz başına çezemez», – dedi Mustafa Cemilev.
Qırımtatar halqınıñ Qurultayınıñ merkeziy saylav komissiyasınıñ reisi Zair Smedlâyev de aynı fikirdedir. O şunı da qayd etti ki, Qırımğa kirişni yasaq etmek kibi qararlar mahkemelerde, ciddiy deliller baqılmasınen, alınmalı.
Mustafa Cemilev mahkeme qararları İsmet Yükselniñ Qırımğa kirişiniñ yasaqlığını lâğu ete bilecegine inanmay. Cemilev öz tecribesinde bunı ögrendi, yani insan aqları boyunca Avropa mahkemesiniñ onıñ oğlunıñ azat etilüvi ile bağlı qararı bile Qırım yolbaşçılığına tesir etmedi.
Salı künü, avgust 12-de, öz başına tayin etilgen baş nazir Sergey Aksönov Qırımda milletlerara ziddiyetlerni doğurğan vatandaşlarğa kiriş yasaq etilecegi aqqında bildirgen edi.
Türkiye vatandaşı, «Qırım haberleri» haber agentliginiñ tesisçisi, Türkiyede qırımtatarlarnıñ medeniyet ve qarşılıqlı yardım Cemiyetiniñ azası İsmet Yükselge Qırımğa kirişini avgust 9 künü yasaq ettiler. Şu künü o, ailesi ile beraber tatillerden qayta edi. İsmet Yüksel Türkiye ükümetine muracaat etecek ola.
Evel böyle yasaq Qırımğa qırımtatar halqınıñ yetekçisi Mustafa Cemilev ve Meclis reisi Refat Çubarovğa berilgen edi.
