Qırımda milletlerara ziddiyetlerni doğurğan vatandaşlarğa kiriş yasaq etilecek, bunı jurnalistlerge öz başına tayin etilgen baş nazir Sergey Aksönov bildirdi, dep haber ete qırım «akimiyeti»ne yaqın olğan Krıminform saytı.
Böyleliknen o, Qırımğa qırımtatar milliy Meclis reisiniñ Türkiye ile munasebetler boyunca keñeşçisi İsmet Yükselge kiriş yasaqlığını añlattı.
«Qırım Cumhuriyetinde milletlerara ziddiyetni doğurmağa tırışqan insanlarğa nisbeten Rusiye Federatsiyasınıñ qanunlarına binayen cezalar kirsetilecek», – dedi Aksönov.
Türkiye vatandaşı, «Qırım haberleri» haber agentliginiñ tesisçisi, Türkiyede qırımtatarlarnıñ medeniyet ve qarşılıqlı yardım Cemiyetiniñ azası İsmet Yükselge Qırımğa kirişini avgust 9 künü yasaq ettiler. Şu künü o, ailesi ile beraber tatillerden qayta edi. İsmet Yüksel Türkiye ükümetine muracaat etecek ola.
Evel böyle yasaq Qırımğa qırımtatar halqınıñ yetekçisi Mustafa Cemilev ve Meclis reisi Refat Çubarovğa berilgen edi.
