Türkiyede, Ankara şeerinde, Rusiye elçihanesi yanında «Qırım haberleri» haber agentliginiñ tesisçisi, Türkiyede qırımtatarlarnıñ medeniyet ve qarşılıqlı yardım Cemiyetiniñ azası İsmet Yükselniñ Qırımğa kiriş yasaqlığına qarşı numayış keçti.
«Qırım haberleri» haber agentliginiñ malümatına köre, numayışnı keçirgen Dernek azaları muracaatnı oquv, Rusiye elçihanesiniñ poçta qutusında qaldırdılar
«İsmet Yüksel 20 yıl devamında Qırımda ailesi ile yaşay. Çoq yıllar devamında Qırımda TİKA tesisçisi edi, «Qırım haberleri» haber agentligini teşkil etti, bundan da ğayrı TRT türk devlet telekorüvge leyhalarnı azırlay edi. İşbu yasaq aynı zamanda matbuat vastalarnıñ serbestlik sıñırılanuvnı ve qırımtatar halqınıñ meselelerini dünyağa bildirmek içün imkân berilmegenini tasdiqalay», – denile beyanatta.
Narazılıq bildirgenlerniñ sözlerine köre, Qırım işğalinden soñ, qırımtatarlarğa etilgen basım küçleşti. Başta Rusiye akimiyeti qırımtatar halqınıñ yetekçisi Mustafa Cemilevni, soñra Meclis reisi Refat Çubarovnı, şimdi ise İsmet Yükselni yarımadağa kirsetmey.
«Biz Türkiye qırımtatar diasporası Rusiye akimiyetiniñ areketlerini takbih etemiz ve dünya toplulığını işbu meseleniñ çezilmesine yardım etmege çağıramız», – denile beyanatta.
Türkiye vatandaşı, «Qırım haberleri» haber agentliginiñ tesisçisi, Türkiyede qırımtatarlarnıñ medeniyet ve qarşılıqlı yardım Cemiyetiniñ azası İsmet Yükselge Qırımğa kirişini avgust 9 künü yasaq ettiler. Şu künü o, ailesi ile beraber tatillerden qayta edi. İsmet Yüksel Türkiye ükümetine muracaat etecek ola.
