Yarımadağa kirişi yasaq olğan «Qırım haberleri» (QHA) agentliginiñ baş tesisçisi, qırımtatar milliy Meclis reisiniñ keñeşçisi İsmet Yüksel nasıldır bir qanunsız ya da menfiy faaliyet alıp barğanı aqqında bir de bir tenbiye, delil almağanını bildirdi, dep haber ete QHA.
«İşbu qarar qanunsızdır. Er bir insannıñ qoranta, öz tarihiy Vatanında yaşamaq içün aqqı bar. Al-azırda bu kibi qarar meni yigirmi yıl devamında yaşağan tuvğan evimden ayıra», – dey İsmet Yüksel.
O, kendi aqlarını bütün qanuniy yollar vastası ile qorçalacağı aqqında ömür-arqadaşı Gayana Yükselniñ sözlerini tasdiqladı. Halqara mahkemelerge, Ukrainada Türkiye Cumhuriyeti elçihanesinden Türkiye ükümetine muracaat etecek. O, Türkiye vatandaşı olıp, 20 yıl devamında Ukrainada yaşay.
Şimdilik faaliyetçi Kiyevde buluna.
Avgust 9 künü Ukraina ve Qırım arasında memuriy sıñırda İsmet Yükselni yarımadağa kirsetmeyip, Rusiyege beş yıl devamında kirişi yasaq olğanı aqqında yasaqnı ilân ettiler.
Evel böyle yasaq Qırımğa qırımtatar halqınıñ yetekçisi Mustafa Cemilev ve Meclis reisi Refat Çubarovğa berilgen edi.
