Rusiye prezidenti Vladimir Putin ile körüşmek içün Rusiye ükümetiniñ ve Devlet Dumasınıñ deputatları Qırımğa keleler, dep yaza Vedomosti neşiri.
Rusiye prezidenti Vladimir Putin ve baş naziri Dmitriy Mededevniñ parlament ile körüşüvleri avgust 14 künü Yalta civarında «Mriya» Sberbank şifahanesinde olmaq kerek, dep yaza neşir.
Başta firqa deputatları ve prezidentniñ özü çıqışta bulunacaq, soñra deputatlar Putinge er bir firqadan beşer sual berecek, dep añlattı gazetağa «Spravedlivaya Rossiya» firqa reisiniñ birinci muavini Mihail Yemelyanov.
Ükümetten bu körüşüvde içtimaiy bölükni idare etken Olga Golodets, Qırım içün mesülietli olğan Dmitriy Kozak baş nazir muavinlerniñ olması beklenile, dep bildire baş nazir muavini Arkadiy Dvorkoviçniñ matbuat kâtibi Aliya Samigullina.
Çıqışlarnıñ 99% Qırımğa ve bugünki siyasiy vaziyetke bağlı olacaq, buña deputatlarnıñ sualleri de bağışlanacaq, dep tahmin ete TSK KPRF kâtibi Vadim Solovyev.
«Yedinaya Rossiya» firqa reisiniñ birinci muavini Nikolay Bulayev siyasiy küçler Qırımda avgust 11 künü toplanacağını bildirdi, aynı şu künü programmanıñ muzakeresi boyunca toplaşuv keçirilecek.
Onıñ sözlerine köre, avgust 12-13 künleri deputatlar sakinler ve ihtisasiy taqımlarnıñ vekilleri ile körüşecekler.
«Yedinaya Rossiya» yuqarı şurasınıñ azası, siyasetşınas Dmitriy Orlov Rusiye prezidenti ile körüşüv Federal toplaşuvğa bildirüv kibi olacağını tüşüne: «Putinden müim lafnı ve tış siyasiy vaziyet boyunca qanuniy tedbirlerni bekleyler. Bu çıqış mıtlaqa körümli olur, körüşüvniñ Qırımda keçirilmesi regionnıñ Rusiye terkibine kirgenini tasdiqlar», dep yaza neşir.
Evel qayd etilgeni kibi, saylav künü arfesinde Rusiye Devlet Duması firqalarınıñ deputatları işğal etilgen Qırım ve Aqyarda iş tatillerini keçireler.
Devlet Duma spiker muavini, «Yedinaya Rossiya» Baş Şurasınıñ kâtibi Sergey Neverov avgust 12-13 künleri firqa deputatları Qırım sakinleri ile 200 körüşüv keçirecegini bildire edi.
