Qırımtatar Milliy Meclisi ukrain Qırım Muhtar Cumhuriyetine Herson vilâyetiniñ bir qaç rayon qoşulmasına qol tuta, Qırım qaytarılması ise – ATO areketlerinen bir derecede Ukrainanıñ müim vazifesidir.
Bunı Kiyevdeki matbuat konferentsiyasında Meclis reisi Refat Çubarov bildirdi, dep haber ete RBK-Ukraina.
«Al-azırda qırımtatar halqınıñ Herson vilâyetinde kelecegini belgilev aqqında aytmaq mümkün degil. Bugünde-bugün Qırım Muhtar Cumhuriyetine Herson vilâyetiniñ bir qaç rayonını qoşıp, onıñ sıñırlarını kenişletüv aqqında laf kete, böylece, Qırımnı idare etüv meseleleri al etile bile», – dep bildirdi Çubarov.
Meclis reisiniñ aytqanına köre, Ukraina memuriy bölünmesiniñ deñişmeleri – Ukrainanıñ anayasa islâatına ait.
«Qırımnı keri qaytaruv meselesi terroristlernen küreş meselesinen bir derecede olmaq kerek. Bazıları tertip bar olğanını tüşüneler: ATO yekünlenmesi aqqında añlaşayıq, soñra al etüvnen oğraşayıq, ve bundan soñ – Qırım qaytarılmasını tüşünerik. Lâkin böyle bir saylav imkânsızdır. Bizler üç maqsat aqqında aynı vaqıtta aytmaq kerekmiz», – dedi Çubarov.
Mütehassıslar işğal etilgen territoriya ve Herson vilâyetiniñ bir qaç rayonından ibaret olacaq Qırım ukrain cumhuriyetini meydanğa ketirmek ğayesini muvafaqiyetli dep tanıylar, lâkin muzakereler ve bayağı iş yapılması kerek olğanını qayd eteler.
