Rusiye prezidenti Vladimir Putin içün Qırımnıñ qaytarıluvı mümkün olmağan bir şeydir, amma Ukraina ve dünya toplulığı Rusiye ile topraq bütünligi ile bağlı razılaşuvlarğa razı olamaz.
Bunı Kiyevde qırımtatarlarnıñ meselelri boyunca tögerek masa devamında qırımtatar milliy Meclisiniñ reisi Refat Çubarov bildirdi.
«Putin içün Qırımnıñ qaytarıluvı mümkün olmağan bir şey olğanını añlaymız. Mümkün degil, çünki böyle qarar onıñ siyasiy, belki de, fizikiy ayatına tesir ete bilecek. O, Rusiye cemiyetini öyle aylandırdı ki, bütün sıñırlarnı keçti, şu cümleden insanlarnıñ ruhiyet ve tabiatı saasında da», – dedi Çubarov.
Meclis reisi şunı da qayd etti ki, dünya quruluşınıñ ümde temelleri nasıldır bir devlet tarafından bozula bilecegi ile dünya razı olmamaq kerek.
Refat Çubarov şunı da qayd etti, eger de dünya cemaatı Rusiyege nasıldır bir kerileme bermege istep, Putin ile muzakerelerge başlasa, işbu razılaşuv nasıl olmaq kerekligini yahşı tüşünmek kerek.
«Eger de bu razılaşuv topraq bütünligine tiyse, ukrainliler qırımtatarlardan soñ nevbet olarğa kelecegine azır olmalı», – dedi Meclis reisi.
O, Frenkistan, Büyük Britaniya ve diger memleketlerniñ Rusiye Federatsiyası ile muzakerelerde qırımtatar halqınıñ taqdirini körmemezlikke urmağa aqları olmağanını qayd etti.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, Ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
