Link açıqlığı

Cemilev: qırımtatar halqınıñ statusı aqqında öz vaqtında qabul etilgen qanun işğalge, belki de, yol bermez edi


Qırımtatarlarnıñ statusı aqqında qanun öz vaqtında qabul etilse edi, Rusiyeniñ sert Qırım işğali, belki de, olmaz edi.

Bunıñ kibi fikirni qırımtatarlarnıñ milliy lideri, Ukraina halq deputatı Mustafa Cemilev Kiyevde avgustnıñ 8-de tögerek masada ifadeledi.

«Tamır halqnıñ aq-uquqlarını pekitken qanun öz vaqtında qabul etilse edi, yarımadada olğanlarğa yol berilmez edi ya da bizim aqlarımıznıñ ğayrıdan tiklenmesi içün küreşimiz bayağı qolaylaştırılır edi», – dep qayd etti o.

Cemilev BMT tamır halqlarnıñ aq-uquqları aqqında beyannamaseni misal olaraq ketirdi.

«Anda öyle bir madde bar ki, oña binaen, tamır halqnıñ razılığı olmasa, onıñ territoriyasında bir de bir cenk keçirilmey ve arbiy bazalar yerleştirilmey», – dep añlattı Cemilev.

Aynı vaqıtta Mustafa Cemilev şunı qayd etti ki, Qırımnı işğal etken memleket BMT deklaratsiyasına qulaq asmaz edi, çünki Rusiye Ukrainanıñ topraq bütünligini kefil etken Budapeşt memorandumını bozdı.

2014 senesi mart 16 künü Qırım ve Aqyarda yarımadanıñ statusı aqqında «referendum» olıp keçti. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ onıñ neticelerini tanımadı ve bunı Rusiye tarafından Qırımnıñ işğali olaraq sayalar.

XS
SM
MD
LG