Keriç paromlı keçitinde avgust 7-de aqşam paromnı tahminen 600 maşina bekley. Qırımğa kirmege istegen maşinalarnıñ sayısı daa da büyük: «Yekâne naqliyat müdirliginiñ» malümatına köre, «Kavkaz» limanında nevbette 2360 maşina tura.
«Qırım-Kavkaz» seferni keçirgen eki büyük paromnıñ bozuluvı sebebinden beklev müddeti uzana bile.
«Şimdilik Keriç keçitinde 4 esas parom yüre. «Nikolay Aksenenko» gemisi bozuldı ve şimdi tamir işleri içün çıqarılğan. «Olimpiada» paromında yuqarı apparel bozuldı, şunıñ içün geminiñ sefer miqdarı eksildi. Qırımğa yol alğan turistlerge cemaat naqliyatnı qullanmağa tevsiye etemiz»,– deyler Yekâne naqliyat müdirliginde.
Evel bildirilgeni kibi, Yekâne naqliyat müdirliginiñ malümatına köre, şimdi Qırımda yarımadanı parom keçiti vastası ile terk etecek tahminen 28 biñ maşina bar eken.
