İşğal etilgen Qırımda, «Yekâne naqliyat müdirligi» şirketiniñ malümatına köre, al-azırda yarımadanı paromlı keçit vastası ile terk etecek 28 biñ maşina tura.
Müdirlikte bu kibi neticelerni öz şahsiy isaiyatı esasında çıqardılar.
«İyün 1 kününden avgust 6-na qadar Qırımğa 108 biñden ziyade maşina kirdi, 80 biñden ziyade ise çıqtı, 28 biñ Qırımda buluna. Eger de bu qalğan turistler aynı zamanda qaytacaq olsa, biz uzun müddetke sürecek nevbetlerge rastkelecekmiz»,– deyler «Yekâne naqliyat müdirligi»nde.
Müessiseniñ malümatına köre, Qırımğa iyün ayında 41 739 maşina, iyülde – 55 234, avgust 1-5 künleri – 11 212 maşina kirdi. Yarımadanı iyünde 29 994 maşina, iyülde – 41 014 maşina, avgust 1-5 künleri – 9 205 maşina terk etti.
Aynı zamanda, şu sırada yarımadağa mahsulatnı ketirgen yük maşinalar barmı, yoqmı, mında qayd etmediler.
Müdirlikte Qırımğa kelgen turistlerge ketüvni evelden planlaştırmağa tevsiye eteler.
Evel qayd etilgeni kibi, avgust 7-de, saba, «Kavkaz» limanında paromğa nevbette 2320 maşina, «Qırım» limanında – 200 maşina tura edi.
