Link açıqlığı

Aqmescit – Aqmescit şeer şurası deputatları, Meclisniñ uquq idaresi yolbaşçısı Teyfuk Gafarovnı bir kereden şeer yolbaşçısı muavini vazifesine tayinlep olamadılar. Onıñ vazifege keçüv meselesine kerekli qadar deputat qol tutmadı. Aynı zamanda, mütehassıslarnıñ fikirince, o ep bir yaqın kelecekte bu vazifege keçecek. Meclis reberleri ise, Gafarovnıñ areketlerini teñqid ettiler.

Teyfuk Gafarovnıñ şuranıñ icra organları faaliyeti boyunca Aqmescit şeer yolbaşçısı muavini vazifesine tayin etilüvi aqqında meselesi, şeer şurası toplaşuvınıñ kün tertibinde birinci yerde bulunğanı içün, bu mesele qolaylıqnen al etileceginde iç bir kimse şübelenmey edi. Faqat, leyhanıñ qabul etilüvine kerek olğan 38 deputattan 37 –si qol tuttı (umumen şeer şurasında 75 vekil bar). Toplaşuvnıñ soñunda deputatlarnıñ biri bu meseleni ğayrıdan baqmağa teklif etti, amma zenaatdaşları çoq qulaq asmadılar.

Şeer yolbaşçısı Viktor Ageyev bu kibi neticege azır olmağanından sebep, Gafarovnıñ muvafaqiyetsizligini tehnikiy meselelernen añlatmağa tırıştı. «O, (Teyfuk Gafarov. – Müellif qaydları.) deputatalarnen qonuşmağa yetiştirmedi», – dep bildirdi Aqmescit meri. Böyleliknen, Gafarovnen bağlı mesele kelecek toplaşuvda baqılacaq.

Meclisniñ uquqiy idaresi yolbaşçısınıñ şeer yolbaşçısı muavini vazifesine keçüvi aqqında haberni temsiliy organnıñ yolbaşçıları teñqid ile qabul ettiler.

Qırımğa kelmege yasaq etilgen Meclis reisi Refat Çubarov, toplaşuvdan evel, Gafarovnıñ mezkür vazifege tayin etilüvini izaat eterek, Kreml ve onıñ tarafdarları «qırımtatarlarnı qullanıp, Rusiyeniñ Qırımğa qarşı istilâsında qırımtatarlar da iştirak etkenini köstermege isteyler. İşte, Meclis azalarına ciddiy basqı yapıla, ve buña qarşılıq kösterip olamağanlar belgilene. Dayanıp olamağanlar sırasına Teyfuk Gafarov da qoşuldı», – dep yazdı Çubarov . Facebook saifesinde.

Qayd etkeni kibi, rey berüvden bir kün ögüne o Gafarovnen bağlandı, amma o fikirini deñiştirmedi. «Qararınıñ ilk nevbette onıñ içün ne qadar zararlı olğanını añlamağa istemedi, eşitmedi», – dep, ilâve etti Çubarov.

Meclis reisi bildirgenine köre, bugünde bugün organnıñ terkibinde bulunğan 33 azadan 3 «bir yıl evelsi Qurultay vekilleri saylanğan vaqıtta vade etkenlerinden vazgeçtiler». «Belki de, daa bir danesi, dörtüncisi olarğa qoşulır, onı, endi çızıqnı keçkenler er kün qandırıp yüreler», – yazdı Çubarov, amma şu insannıñ adını añmadı.

Bunen beraber, o, Meclis reisi olıp ta, ağır vaziyette Qırımda bulunmaq imkânı olmağan vaqıtta «bunıñ episini körip, ıncınğanını» bildirdi.

«Çubarovnıñ yoqluğı Meclisniñ içindeki tertipke tesir etti»

Meclis reisi muavini Nariman Celâl, Qırım.Aqiqatqa izaat bererek, Gafarov «akimiyetnen» işbirlik köpürini qurmağa teklif etken edi, dep ayttı.

«Aqmescit şeer yolbaşçısı muavini vazifesine keçmek içün Teyfuk Gafarovnı ne teşviq etkenini añlatmaq küç, amma, o öz menfaatını deñiştirmegenini ayta bilem. Çünki, Qırımda bu areketler başlağanınen – yani martnıñ soñundan – o akimiyet ile sıq bağda bulunmağa teklif ete edi», – añlattı Celâl. Onıñ sözlerine köre, Gafarov, qırımtatarlar akimiyet organlarında bulunıp, halqnıñ meselelerini çezmeli, kibi fikirniñ tarafdarı.

Celâlnıñ fikirince, Meclis reisiniñ yoqluğı Gafarovnıñ qararına tesir etti. «Çubarovnıñ yoqluğı Meclis içindeki tertipke tesir etkendir. Amma, men bu meselede bir sıra müsbet noqtalarnı körem. Bugünde bugün, biz belli bir seçim yapıp, digerlerge buña qıymet kesmege aq beremiz. Men kimnidir sögmek, aşalamaq degil de, özümiz içün qaydlar yapıp, ileride halqnı kimler temsil etmege lâyıq olğanlarını añlamalımız, belli bir areketler yapıp, kimi aqlı olğanını körmelimiz», – dep ayttı Meclis reisi muavini.

Qırımlı siyasetşınas Vladimir Yegorov emin, şeer şurasında muavfaqiyetsiz keçken rey berüvge baqmadan, Gafarovnıñ tayinlenüvi aqqında mesele eñ yaqın zamanda al etilecek. Yegorov, Qırım.Aqiqatqa bildirgeni kibi, «muvafaqiyetsiz rey berüvniñ esas maqsadı, şeer yolbaşçısınıñ olаcaq muavinine birden yerini köstermek edi. Elbette ki, oña Aqmescitnen bağlı ciddiy meselelerni çezmege bir kimse izin bermez, karyerasını da anda qurıp olamaz».

Ekspert aytqanı kibi, Meclisni küçsüz qaldırmaq ceryanı devam etecek. «Bunıñ episi Kreml ve bütün dünyağa işğal etici akimiyetni er kes destekley, dep, köz boyama içün yapıla. Olar, kadrlarnı celp etmege tırışacaqlar, ilk nevbette iş-adamlar ve fikirlerniñ liderleri közge alınacaq, bu kibi areketler regionlarda da yüz bere, Gafarovnen bağlı vaziyet ise daa keñiş dairelerde muzakere etile», – dep qayd etti ekspert.

Qırım.Aqiqat Teyfuk Gafarovnıñ fikirini öyle de ögrenip olamadı. Kün devamında o, toplaşuv neticelerini izaat etmege işandırğan edi, amma, onıñnen bağlanıp olamadıq.

Hatırlatamız, soñki vaqıtları Meclisniñ razılığı olmadan, «Devlet şurası» «spiker muavini» vazifesine Meclis azası Remzi İlyasov, Aluşta yolbaşçı muavini yerine – Qurultay vekili Enver Arpatlı tayinlendi. Bundan da ğayrı, Meclis reisiniñ sabıq muavini Zaur Smirnov, temsiliy organnıñ vazifeni terk etmege çağıruvlarına baqmadan, bugünki künde Qırım «devlet milletler komiteti» reisi vazifesinde buluna.

XS
SM
MD
LG