Qırımtatar Milliy Meclisiniñ reisi Refat Çubarovnı bazı Meclis azalarınıñ Qırımnıñ işğal akimiyeti ile iş tutmaq qararı raatsızlay. Lâkin bunı o Kremlniñ sıqıştıruvınen bağlay.
Bunı Çubarov Facebook saifesinde bildirdi.
Böylece, Çubarov Aqmescit şeer yolbaşçısınıñ muavini vazifesine Meclisniñ uquq bölük reberi Teyfuk Gafarovnıñ tayinlenmesine kendi munasebetini ifadeledi.
«Kreml ve onıñ hızmetçileri kene de qırımtatar faktorını acele sürette qullanacaq olalar, Rusiyeniñ Qırımğa nisbeten kenişletüv planlarına qırımtatarlarnıñ da alâqası bar olğanını köstermege tırışalar. Mından, Qırımtatar Milliy Meclisiniñ azalarını basım, sıqıştıruvğa dayanıp olamaycaq azalarnı belgilev. Bunıñ kibi sıqıştıruvğa dayanıp olamağanlardan biri Teyfuk Gafarov oldı», – dep yazdı Çubarov.
O, Gafarovnen bağlanğan edi, lâkin o kendi fikirinden vazgeçmedi.
«Onıñ qabul etken qararınıñ aqibetleriniñ, ilk evelâ şahsen onıñ içün, havfları aqqında delillerni eşitip olamadı/istemedi», – dep yaza Meclis reisi.
Çubarov buña dayanıp olmağanını gizlemey, lâkin bunı kene de temizlev olaraq tanıy.
«Demek, bugünde-bugün Qırımtatar Milliy Meclisiniñ 33 azasından üç kişi bir yıl evelsi qırımtatar halqı Qurultayınıñ delegatları olaraq saylanğan vaqıtta seslendirgen printsiplerinden vazgeçti. Belki de, daa bir kişi, dörtünci, olacaq, qarardan keçkenler onıñnen er kün qonuşalar. Men, Qırımtatar Milliy Meclisiniñ reisi olıp, o qadar qıyın vaqıtlarda Qırımda bulunıp olamayım ve bunı qabul etip olamayım. Lâkin temizlev qolay olacağını birisi aytqan edimi?».
Onıñ qayd etkenine köre, böyle adımlar Kremlniñ «Qırım işğali içün cevap berecegini ve onı keri Ukrainağa qaytarmaq kerek olacağını» añlağanını isbatlay.
Malüm ki, bugün Aqmescit şeer şurasınıñ nevbetten tış 88-inci sessiyasında Teyfuk Gafarovnıñ Aqmescit şeer yolbaşçısınıñ muavini vazifesine tayinlev meselesine rey berüv neticesiz oldı.
Leyha esas olaraq bile qabul etilmedi – yalıñız 37 kişi rey berdi. 6 insan rey bermedi. Umumen zalda 47 deputat qayd etildi.
Aqmescit şeer yolbaşçısı Viktor Ageyev mezkür vaziyetni «tehnikiy hata» dep añlattı. Teyfuk Gafarov deputatlarnen qonuşmağa yetiştirmegen eken. Tezden işbu mesele kene de rey berüvge çıqarılacaq.
Şeer başı Viktor Ageyev tarafından kirsetilgen şeer şurasınıñ qarar leyhasına köre, Gafarov şuranıñ icra organları faaliyetiniñ meseleleri boyunca şeer başı muavini vazifesini «vaqtınca, Aqmescit şeerinde Rusiye Federatsiyasınıñ qanunlarına ve Qırım Cumhuriyetiniñ uquqiy aktlarına köre, yerli idare organlarnıñ teşkil etilmesiniñ bitmesine qadar» eda etecek.
