Link açıqlığı

Saatnıñ esas haberi

Vladimir Putin akimiyetten çekilse, Qırım Ukraina terkibine keri qaytacaq, dep bildire qırımtatar halqınıñ milliy lideri, Ukraina halq deputatı Mustafa Cemilev.

Bunı o «GORDON» leyhasınıñ reberi Dmitriy Gordonğa intervyü vaqtında bildirdi.

«Qırım rusiyeli olmaycaq, men eminim! Birinciden, bu Rusiye içün bile zararlı olacaq, Putin akimiyet başında qalğance, Qırım rusiyeli olacaq, onıñ akimiyette daa ne qadar olacağını tek Allah bile: belki, 2 kün, belki de, 20 yıl», – dep ayttı Cemilev.

Onıñ fikirince, Kreml Ukrainağa qarşı istilâsını quvetleştirse, Rusiye dağılıp başlaycaq.

«Soñra Rusiyeniñ soñu olacaq. İnsan qurbanları ve dağıluvlar olsa da, olardan soñ bu istilâcı memleket yoq olacaq», – dep qayd etti Cemilev.

Halq deputatnıñ aytqanına köre, bundan soñ, Qırım Ukraina terkibine keri qaytacaq.

«Buña bir qaç aydan bir qaç yılğa qadar vaqıt kerek, lâkin o (Qırım – muarrir) Rusiyege ait territoriya olacağına... men işanmayım», – dedi Cemilev.

2014 senesi mart 16 künü Qırım ve Aqyarda yarımadanıñ statusı aqqında «referendum» olıp keçti. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ onıñ neticelerini tanımadı ve bunı Rusiye tarafından Qırımnıñ işğali olaraq sayalar.

XS
SM
MD
LG