Qırımtatar Milliy Meclisi uquq idaresiniñ reberi Teyfuk Gafarovnıñ Aqmescit şeer yolbaşçısınıñ muavini vazifesine tayinlev meselesi qaldırıldı, çünki Aqmescit şeer şurası deputatlarınıñ reyleri yeterli olmadı. Bunı QHA bildire.
Leyha esas olaraq bile qabul etilmedi – yalıñız 37 kişi rey berdi. 6 insan rey bermedi. Umumen zalda 47 deputat qayd etildi.
Aqmescit şeer yolbaşçısı Viktor Ageyev mezkür vaziyetni «tehnikiy hata» dep añlattı. Teyfuk Gafarov deputatlarnen qonuşmağa yetiştirmegen eken. Tezden işbu mesele kene de rey berüvge çıqarılacaq.
Gafarovnıñ Aqmescit şeer yolbaşçısınıñ muavini vazifesine tayinlev meselesi avgustnıñ 5-de aydınlatıldı.
Şeer başı Viktor Ageyev tarafından kirsetilgen şeer şurasınıñ qarar leyhasına köre, Gafarov şuranıñ icra organları faaliyetiniñ meseleleri boyunca şeer başı muavini vazifesini «vaqtınca, Aqmescit şeerinde Rusiye Federatsiyasınıñ qanunlarına ve Qırım Cumhuriyetiniñ uquqiy aktlarına köre, yerli idare organlarnıñ teşkil etilmesiniñ bitmesine qadar» eda etecek.
Qırımtatar Milliy Meclisiniñ reisi Refat Çubarov Facbook saifesinde bildirdi ki, Gafarov Kreml hızmetçileriniñ basqısına dayanmayıp, «akimiyetke» qoşuldı.
