Aqmescit müşterilerinde «MTS-Ukraina» bağı, şeerde hızmetni temin etken köşe obyekti işlemegeni sebebinden yoq oldı.
Bunı Qırım.Aqiqatqa mobil operatornıñ matbuat hızmeti bildire.
«Anda ne olğanını añlamaymız, vaziyetni ögrenip, bağnı pekitmege çalışamız. Atta hadimlerimiz ile bağlanıp olamaymız. Amma Qırımnıñ diger şeerlerinde bağ bar», – deyler matbuat hızmetinde.
Mında şunı da qayd ettiler ki, şimdi Qırımda şirketniñ imkânları sıñırlı, şunıñ içün nasıldır bir meselelerni de yoq etmege qıyın. Aqmescitte bağ ne vaqıt peyda olacağını aytıp olamaylar.
«Yarımadada ne olayatqanını bilmeymiz, çünki nezaret imkâniyetimiz sıñırlıdır. Bağ tüyümi ne sebepten toqtatılğanını bilmeymiz, amma mütehassıslarımız bunı ögrene. Teessüf ki, er şey bizge bağlı olmağanını siz de añlaysıñız», – deyler şirkette.
Bunıñ ile matbuat hızmetinde şunı da bildireler ki, şirket Qırımda işini toqtatmaycaq, şunıñ içün «MTS-Ukraina» 48 saat devamında Qırım müşterilerini bağsız qaldıracağı aqqında bildirüv yañlıştır.
«Anda kim nasıl areketlerni yapa, bilmeyim, amma biz qırımlı müşterilerni bağsız qaldırmaycaqmız. Biz bunı er vaqıt aytamız ve aytacaqmız», – deyler şirkette.
Salı künü Aqmescit müşterilerinde «MTS-Ukraina» bağı yoq oldı. Qırım «akimiyeti» eki kün içinde diger Qırım müşterileri de bağsız qalacağını bildire.
«Söndürüv ket-kete olacaq, şimdi Aqmescit. Eki kün içinde «MTS-Ukraina» bütün bağnı söndürir»,– dep bildire Qırım «baş nazir muavini» Dmitriy Polonskiyniñ sözlerini öz başına tayin etilgen akimiyetiniñ ruporı Krıminform saytı.
Yarımadada avgust 5-den ukrain operatorlarnıñ söndürüvini Polonskiy daa cumaertesi künü bildirgen edi.
