«K-Telekom» ilk rusiyeli bağ operatorı bazarertesi künü, avgustnıñ 4-de, Qırımda çalışıp başladı.
Bunı Rusiye baş naziri Dmitriy Medvedev Aqmescit ile video konferentsiyada bildirdi, dep haber ete Qırım.Aqiqat mühbiri.
«Bugün yarımadada «K-Telekom» rusiyeli bağ operatorı çalışıp başladı. Adamlar GSM formatında zemaneviy, ümüt etem ki, işançlı hızmetler alacaqlar», – dep ayttı Medvedev.
Rusiye bağ ve kütleviy alâqalar naziri Nikolay Nikiforovnıñ bergen malümatına köre, qırımlılar aman-aman 800 biñ Rusiye SİM-kartını satın aldılar, daa 1,2 mln dane satıla.
Roskomnadzor reberi Aleksandr Jarov Rusiye kütleviy haber vastalarına bergen intervyüsında bildirdi ki, «K-Telekom» ve Vimpelcom Qırımda yañı bağ quracaqlar.
«K-Telekom» şirketiniñ saytınıñ malümatına köre, bu çoq hızmetli bir bağ operatorı.
Keçken afta Qırım «baş naziriniñ muavini» Dmitriy Polonskiy avgustnıñ 5-de ukrain bağ operatorları işğal etilgen Qırımda hızmetlerini toqtatacaqlar, dep bildirdi. Lâkin ukrain bağ operatorlarınıñ vekilleri işbu malümatnı red ettiler.
