2020 senesine qadar Qırım ve Aqyarnıñ içtimaiy-iqtisadiy inkişafı boyunca federal maqsat programma leyhasında Qırımdaki «Artek» eñ büyük bala lageri inkişafına 21 mlrd ruble ayırılması da qayd etilgen.
Bunı Rusiye ükümetiniñ reis muavini Olga Golodets bildirdi, dep haber ete Qırım «ükümetine» yaqın olğan Krıminform saytı.
«Artek» inkişafına 21 mlrd ruble ayırmağa planlaştırıla, bu dört yıl devamındadır», – dep ayttı jurnalistlerge Golodets. O, Habarovskta yüz bergen suv basuvı neticesinde zarar körgen balalar raatlanğan Kezlevdeki «Beregovoy» bala şifahanesini ziyaret etti.
Baş nazir muavininiñ aytqanına köre, kelecek sene Qırımdaki yaz bala raatlığınıñ programması «Artekniñ» 90 yıllığından başlanacaq. Bunıñnen bağlı merasimlerni yüksek derecede keçirmege vade eteler.
