Link açıqlığı

Çernomorskaya teleradiokompaniyasınıñ reberligine telekompaniya binasına kirmege ruhset berdiler. Avgustnıñ 4-de saba olarnı politsiya hadimleri kirsetmegen ediler.

Qırım.Aqiqat mühbiriniñ bildirgenine köre, telekompaniya hadimleri ve jurnalistlerden ğayrı prokuratura vekilleri de keldiler, telekanal yanında Qırım samooboronasınıñ temsilcileri de buluna, lâkin ne sebepten jurnalistlerge bir kimse aytıp olamay.

Bu arada, telekompaniya binası yanında politsiya bulunmasını uquq qoruyıcılar «mahkeme qararı boyunca binanı qoruv vastaları» olaraq izaatladılar.

Reberlikke anahtalarnı qaytardılar ve telekompaniya hadimleri diger jurnalistlernen beraber binağa kirip, bütün tehnika çıqarılğanını kördiler – kamera, pült, bilgisayarlar. Olarnı daa cuma künü, avgustnıñ 1-de, çıqarğandırlar.

Avgustnıñ 4-de saba «Çernomorskaya» teleradiokompaniyasınıñ prezident vazifelerini eda etken Lüdmila Juravlövanı politsiya hadimleri «reberlik avalesine» esaslanıp, telekompaniyağa kirsetmediler.

ÇTRK uquqçısı Andrey Bespoyasnıynıñ aytqanına köre, politsiya hadimleriniñ areketleri qanunsızdır, ÇTRK vekilleri mahkeme ve prokuraturağa şikâyet etecekler.

Cuma künü, avgustnıñ 1-de, mahkeme pristavlarınıñ Federal hızmeti Qırımdaki muhalifet telekanalı «Çernomorskaya teleradiokompaniyasına» kelip, mal-mülkini tevqif etti ve bütün hadimlerini binadan quvdı.

Qırım RTPTsniñ «Çernomorskaya teleradiokompaniyasına» qarşı mahkeme davası birinci instantsiya mahkemesi tarafından bile baqılmadı. Buña baqmadan, telekompaniyanıñ bütün mal-mülki ve donatmaları tevqif etildi, böyleliknen şirket işi toqtatıldı, dep haber etti telekompaniya prezidenti vazifelerini eda etken Lüdmila Juravlöva. Teleradiokompaniya binasından tehnikiy donatmalar, esasen bilgisayarlar çıqarıldı.

XS
SM
MD
LG