Link açıqlığı

Uquq qoruyıcılarnı qırımtatarı Reşat Ametovnıñ öldürüv «taqiqatı» raatsızlata


Qırımnıñ «akimiyet organları» Qırımda olğan öldürüvlerniñ taqiqat ketişatı aqqında malümatnı bermeyler. Şu cümleden, Reşat Ametovnıñ öldürüvi aqqında.

Bunı insan aqları boyunca qırım eyyeti bildire, dep haber ete Qırım.Aqiqat mühbiri.

Uquq qorçalayıcılar ukrain arbiy-deñiz quvetleriniñ mayorı Stanislav Karaçevskiy ve 16 yaşında olğan Mark İvanükniñ öldürüvleri aqqında malümat olmağanını da qayd ete.

«Taqiqatnıñ areketsizligi ve qırım akimiyet organlarnıñ ölürüvlerniñ taqiqatında iştirak etmegeni yaşayış aqqınıñ qoruvı boyunca mecburiyetlerniñ eda etilmegenini köstere», – deyler uquq qorçalayıcılar.

Olar şuna da diqqat ayıralar ki, işbu öldürüvlerniñ şaraitleri siyasiy maqsatlarğa bağlı olğan edi.

«Alâ daa refernedum (mart 16 künü) arfesinde ğayıp olğan Aqyar sakini, Avtomaydan faaliyetçi Vasiliy Çernışnıñ taqdiri belgisizdir. Soñki sefer onıñ ile bağ mart 15 künü edi. Vasiliyniñ soy-sopları onıñ endi sağ olmağanını tüşüneler», – denile eyyetniñ haberlerinde.

Belli olğanı kibi, mart 15 künü Qırımnıñ Qarasuvbazar rayonında qırımtatarnıñ ceseti tapıldı. Bu insan 38 yaşında Reşat Ametov edi. Mart 3 künü adam voyenkomatqa yazılmaq içün evinden çıqqan edi. Soñra onı Aqmescitniñ Lenin meydanında kördiler. Kameralardan körüngeni kibi, o, Qırım işğaline qarşı narazılıq numayışında iştirak ete edi. Andan onı belgisiz yönelişke «Qırım halq imayesi»niñ vekilleri alıp ketti. Eki aftadan soñ ise onı Qarasuvbazar rayonında cansız alda taptılar.

Aprel 3kunü ukrain arbiy qısmınıñ mayorı, 33 yaşında olğan Stanislav Karaçevskiyni öldürdiler.

Aprel 20 künü Rovensk vilâyetiniñ sakini, 16 yaşında olğan Mark İvançuknı cansız alda taptılar.

XS
SM
MD
LG