Mahkeme hadimlerniñ federal hızmeti Aqmescitte, Radio, 4 adresi boyunca yerleşken Qırımda muhalif sayılğan «Çernomorskaya teleradiokompaniya» telekanalına kelip, mülkni apis etmekteler.
Bunı Qırım.Aqiqat saytına telekanalnıñ adliyecisi Andrey Bespoyasnıy bildirdi.
Onıñ sözlerine köre, bugün kündüz binağa Qırım Radiotelevizion merkeziniñ davanıñ amelge keçirilüvi boyunca Qırım Hocalıq mahkemesiniñ Çernomorskaya TRK-nıñ malükiniñ apis etüvi aqqında qararı ile formalı insanlar keldi.
«Qarar tünevin berildi, bugün ise olar onı endi bizge taqdim ettiler. Bu endi qanunsız arekettir, bizge onıñ ile tanış olmaq içün eñ azından bir kün bermek kerek ediler, – dey adliyeci. – Şimdi azbarda 30 hadim tura, içeri kirsetmeyler, qapığa kilit astılar. İçeri formalı insanlar buluna. Kimlerdir? Bizlerge özlerini tanıtmadılar. Eki kamera da bar edi, olar da bizge şeadetnamelerini köstermediler».
Bunıñ ile, onıñ sözlerine köre, insanlar hadimlerge bilgisayarlarnı söndürmemege emir ettiler.
Adliyeci tüşüne ki, RTPTs talapları temelsizdir. Bunı şusı tasdiqlay ki, mahkeme işbu talapnı üç kere red ete edi.
«Soñra olar bütün talaplarnı birleştirli ve mahkeme RTPTs şikâyetini bütünley qabul etti», – dedi adliyeci.
O şunı da qayd etti ki, telekompaniya bu qararğa itiraz bildirecek eken.
Öz başına ilân etilgen akimiyetiniñ ruporı Krıminform saytınıñ malümatına köre, mahkeme mülkni borclardan sebep apis etti. Söz tahminen 4 mln ruble aqqında kete.
