Mahkeme içtimaiy ağda natsizmni teşviq etken Saqnıñ 30 yaşında sakinine nisbeten qarar çıqardı.
Bunı Qırım «prokuratura»sınıñ matbuat hızmeti bildire.
Müessiseniñ matbuat hızmeti bergen malümatına köre, erkek Rusiye Federatsiyasınıñ Cinaiy Kodeksi 282 maddesiniñ 1-nci qısmına binayen qabaatlana – cemaat ögünde millet alâmetleri boyunca duşmanlıq ve nefretniñ qozğalavı.
«Saq rayonınıñ 30 yaşında sakini milliy-radikal nazarlarnıñ tarafdarı olıp, «VKontakte» içtimaiy ağda öz şahsiy saifesinde millet alâmetleri boyunca birleşken insanlarğa nisebeten nefret ve duşmanlıqnı aydınlatqan resim ve metinlerni yerleştire edi», – denile beyanatta.
Mahkeme erkekni 1 yıl 6 ay müddetke azatlıqtan marum etmege qarar aldı ve şartlı cezanı çıqardı.
