Cumaaqşamı künü, iyül 30-da, «prokuratura» hadimleri Aqmescitte Şmidt,2 soqağı boyunca yerleşken «Qırım Fondı» hayriye teşkilâtına, işbu binada qırımtatar milliy Meclisi de buluna, yañı celpname ile keldi.
Bunı Qırım.Aqiqat saytına qırımtatar milliy Meclisiniñ tış alâqalar idaresiniñ yolbaşçısı Ali Hamzin bildirdi.
«Ketirilgen celpnamege binayen, «Qırım Fondı» bugün prokuraturağa kelip, öz faaliyeti aqqında esabat bermeli. Amma bu olacaq bir şey degil, çünki bu kibi esabatlarnı azırlamaq içün eñ azından bir qaç kün kerek», – dedi Hamzin.
Onıñ sözlerine köre, böyle talaplar atta Rusiye qanunlarına köre yükseltilgendir. Bunıñ ile celpnamede nasıldır bir muayyen qararlar aqqında bir şey yazılmay.
Hamzin qayd etkeni kibi, bugünki «akimiyet» böyleliknen Meclisni sıqıştarmağa devam ete. O, «Qırım Fondı»nıñ faaliyetini yasaq etmege tırışqanlarını tüşüne.
«Qırım Fondı bizim içün pek müim bir teşkilâttır, terkibimizniñ hayriye teşkilâtıdır, – dey Hamzin. – Menimce, olar mıtlaqa nasıldır bir bozuluvlarnı uydurıp çıqarırlar ve bu Fondnıñ faaliyetini de yasaq ete bilirler».
O şunı da qayd etti ki, Fond qırımtatar halqınıñ Qurultayı tarafından teşkil etildi. Onıñ prezidenti ise qırımtatarlarnıñ milliy lideri, Ukraina halq deputatı Mustafa Cemilevdir. Bunı nazarda tutmaq kerek, dep tüşüne Hamzin.
«Biz basım duymaqtamız. Bizge fikrimizni bildirmege bermeyler, Qurultay ve Meclisni yoq etmek yönelişte endi Rusiye qanunları bile bozula», – dey o.
Onıñ sözlerine binayen, eger de vaziyet kerginleşse, Fond ve Meclis destek ve qoruvnı halqara uquqiy terkiplerde qıdıracaq.
