Link açıqlığı

Saatnıñ esas haberi

Qırımtatar milliy Meclis reisiniñ muavini Ahtem Çiygoz Bağçasaray akimiyetiniñ regional meclis bulunğan binanıñ kira añlaşmasınıñ meselesinde iştiragini şeer başı Konstantin Rubanenkonıñ siyasiy menfaatı ile bağlay.

Bağçasaraу şeer yolbaşçılığı saytında olğan malümatqa köre, söz Bağçasarayda Puşkin, 1 soqağı boyunca yerleşken ZAGS binasınıñ birinci qatını kirağa alğan «Ocalar şurası» aqqında kete.

Şeer yolbaşçılığı cemaat teşkilâtı kira añlaşmasınıñ şartlarını bozğanını qayd ete.

«Añlaşmanıñ qaidelerinden birisinde böyle aytıla – eger de kira parası 3 ay devamında berilmese – añlaşma avtomatik sürette lâğu etilgen kibi sayılacaq. Şimdi kira tölenilmesiniñ müddeti bozuldı. 3 ay yerinde, kira parası yarım yıl tölenilmedi.Eki kere. Yani ödev yarım yılda bir kere ola edi», – denile beyanatta.

Mında binanıñ tarihiy ve mimariy qıymeti olğanını da bidireler. Şunıñ içün binanıñ sigortası da mıtlaqa olmalı.

«Böyle etip, kira añlaşmanıñ imzalanuvından bir ay keçkeni ile kiracı mülkniñ sigortasını etmeli. Binanıñ qullanuv müddeti devamında (2 yıl) kiracı bunı etmedi», – deyler şeer yolbaşçılığında.

Bunıñ ile Ahtem Çiygoznıñ sözlerine köre, kira borcunıñ miqdarı 105 grivnanı teşkil ete eken.

«Bu er şey özüni Mecliske qarşı küreşni alıp barğan qaraman olaraq köstermek içün yapıla, menimce. 105 grivna aqqında aytmağa bile külünçli, birinciden. Ekinciden, belli olğan adiselerden sebep, banklarnıñ işi bir qaç ay devamında toqtatılğan edi. Em de imkân peyda olğanınen, biz borcnı töledik. Üçünciden, şeerde kiranı iç ödemegen obyektler bar olğanını bilem, mında ise borc 10 biñlerni teşkil ete», – dedi Çiygoz.

Çiygoznıñ sözlerine köre, Konstantin Rubanenko kelecek saylavlarda «reylerni» qazanmaq içün Meclisniñ bölügine basım köstere.

Belli olğanı kibi, Bağçasaray şeer başı «Devlet şurasına» «Yedinaya Rossiya» firqasınıñ cedvelleri boyunca kete.

XS
SM
MD
LG