İşğal etilgen Keriçte «Snіdanok s 1 +1» mühbiri Roman Şişkinge ukrain timsalli futbolkası sebebinden ücüm ettiler. Bunı TSN bildire.
Romannıñ sözlerine köre, o, Keriç paromlı keçiti kassalarından çıqqanda, onı tahminen 30 yaşında bir erkek türtti, Şişkin yıqıldı.
«Jurnalist erkekke yetişip, areketiniñ sebebini soradı. Cevap olaraq adam onı küfürlep, kökregini urdı. Qayd etmeli ki, ziddiyet etrafında olğanlar mühbirniñ tarafını aldı ve şu adamnı yüzley ediler», – dep qayd ete neşir.
Roman Şişkin militsiya bölügine muracaat etti. Ücüm etken adamnı Rusiyeli nomeraları olğan maşinada taptılar. Belli olğanı kibi, adam Qırımğa Lugansktan keldi.
Mühbir ziyan ve sağlığına ketirilgen zararnı tazmini etmek talabı ile ariza yazdı. Şişkinniñ sözlerine köre, ziddiyetten soñ onıñ qan basımı yükseldi, bunı tibbiy teşkerüv de tasdiqladı, bundan da ğayrı, bağır ağrısı da duyula, – yaza neşir.
İyül 31 künü mühbir kene taqiqatçığa baracaq. Neşirniñ malümatına köre, Roman Şişkin Keriçte tatilde buluna, o, ana-babasını ziyaret etmek içün kelgen eken.
