Aqmescitte bala hastahanesinde bala ölümi boyunca cinaiy iş açıldı.
Bunı Qırım Taqiqat komitetiniñ matbuat hızmeti bildire.
Taqiqatnıñ malümatına köre, 2014 senesi iyül 26-da kündüz Aqmescitte KRU «Bala klinik hastahanesi»nde 12 yaşında oğlan elâk oldı. Onı 2014 senesi iyül 3 künü Keriç bala hastahanesinden ketirdiler.
Rusiye Federatsiyasınıñ Cinaiy Kodeksi 109-ncı maddesiniñ 2-nci qısmına binayen cinaiy iş açıldı (ihtisasiy mecburiyetlerniñ zaruriy şekilde eda etilmegeni sebebinden ölümge ketirüv).
Al-azırda bu cinayetçilikniñ sebepleri ögrenile. Em de buña bağlı olğan şahıs da belgiyendi.
Yaqında, iyül 11 künü, qursaq ağırlarına şikâyet etken 8 yaşında oğlan KRU «Bala klinik hastahanesi»ne muracaat etti. Mında onı hirurglar baqtı. Bir qaç saatten soñ bala öldi. Aynı madde boyunca cinaiy iş açılğan edi.
