Link açıqlığı

Ekspertniñ «Milli Firka»nıñ keleceginen bağlı fikirleri: Ruslarnıñ bu kibi şeriklerde ihtiyacı yoq


«Milli Firka»nıñ bayrağı

Aqmescit – «Milli Firka» ve «Qırım birligi» cemaat teşkilâtları kendi «qırımtatar halqı şurasını» meydanğa ketirip, Qırım «akimiyetinde» vazifelerge öz namzetlerni köstermege qarar aldılar. Böyle etip halq oğrunda hızmetnen bağlaylar. Faqat, mütehassıslar, mezkür teşkilâtlarnıñ esas niyeti Qurultay – Meclis ve Qırım «akimiyeti» arasında davanı öz menfaatlarına qullanıp, «otuz rublege satılacaqlarını» aytalar.

«Qırımtatar halqı cemaat şurası»nıñ teşkil etilüvi aqqında Qırım.Aqiqatqa «Milliy firka» teşkilâtı keñeşiniñ reisi Enver Kantemir-Ümerov bildirdi. Aytqanına köre, keçenlerde «Milli firka» ve «Qırım birligi» añlaşma tizip, küzdeki saylavlarğa «belgilegen yekâne cedvel» boyunca qatnaşacaqlar.

«Eñ yaqın vaqıtta teşkilâtlarımıznıñ vekilleri Devlet şurası ve Nazirler şurasında, em de yerli akimiyet organlarında temsil etilecekler», - dedi «Milli firka» reberi.

Bildirgenine köre, «qırımtatar halqı şurası» terkibine, yarımadadanıñ er türlü teşkilâtı ve Meclis azaları da kire bile.

«Meclis azalarından biri, belli bir teşkilât ve halqnıñ bir qısımı tarafından desteklense ve baqışları teşkilât, Qırım cemaatçılığı, devlet siyasetiniñ menfaatlarına zıt kelmese, elbette qoşula bileler», - qayd etti Ümerov.

Aynı zamanda qırımtatar milliy areketniñ azası, Qurultaynıñ Merkeziy saylav komisiyasınıñ reberi Zair Smedlâyev Meclis azalarnıñ qoşuluvı aqqında ğayeni teñqid etti.

«Bu, bir de bir köy şurası Yuqarı Rada azalarına kendi saflarına qoşulmağa teklifine oşay», – dep bildirdi Smedlâyev.

Zair Smedlâyev, «Milli firka» Ukraina Selân Demokratik Firqası erkânında cumhuriyetniñ parlamentine keçmege ıntılğanını, amma öyle de keçip olamağanın hatırlattı. İşte, bu fakt teşkilâtnıñ halq arasında ne derecede belli olğanını köstere, dey Qurultay vekili.

«Halq olarnı desteklegen olsa edi, Qurultayğa namzetlerini kösterir ediler», - dep qayd ete Smedlâyev.

Marginallar «otuz rublege» Rusiye akimiyetine satılcaq olalarmı?

Kiyevdeki Yaqın Şarqiy taqiqatlar Merkeziniñ müdiri İgor Semivolos Qırım. Aqiqatqa izaat bererek, «Milli firka» - belli, amma marginal teşkilâtı olıp, qırımtatar areketinde iç bir türlü tesiri olmağanını bildirdi.

Añlatqanına köre, teşkilât, Meclis-Qurultay ve «akimiyet» arasında olğan davanı öz menfaatlarında qullanmağa ve «otuz rublege» satılmağa istey.

«Milli firka» azaları «Qırım Rusiyege qoşulğanı» içün mukâfatlar aldılar
«Milli firka» azaları «Qırım Rusiyege qoşulğanı» içün mukâfatlar aldılar

«Bu yañı siyaset degil. Tamam bu kibi şeyni Yanukoviç üküm etken vaqıtta da yapa ediler. Olar ayın-oyunlarını devam eteler, yañı ğaye, dellileri yoq, satılalar, işte», - dey ekspert.

Aynı zamanda Semivolos, Meclis raqipleriniñ muavafaiyetinde şübelene. «Olar iç bir şeyge irişip olamazlar. Bu Çeçenistan degil, mında ruslar telükesizlik içün para tölemeyler. Bu kibi şerikler ruslarğa kerek degil», - dedi o.

Ekspertniñ fikirince, bu teşkilâtlar bir qaç deputatnı keçirip olurlar, amma qırımtatarlar olar içün ses bermezler.

Evelden bildirilgeni kibi, Qırım «Devlet şurasına» saylavlar sentâbrniñ 14-nde ötkerilecek. Onıñ terkibine firqa cedvelleri boyunca 50 deputat ve bir mandatlı majoritar okrugı boyunca 25 deputat saylanacaq.

XS
SM
MD
LG