Keriç keçitinden yolcu demir yol seferlerniñ açıluvı Ukrainadan keçken seferlerniñ qısqartuvına ketirmez. Bunı iyül 29 künü «Qırım demir yolu» şirketiniñ başı Andrey Karakulkin bildirdi.
«Ne seferlerniñ, ne Ukrainadan keçken trenlerniñ vagon qısqartuvını planlaştırmaymız. Aksine, ukrain yönelişi boyunca baracaq trenlerniñ sayısını artacaq olamız», – dedi Karakulkin.
Onıñ sözlerine köre, Moskva-Aqmescit yañı treni «Ukraina buhranı sebebinden adetiy naqliyat ile faydalanmağa qorqqan» yolcular içün Keriç keçitinden Ukrainanı dolanıp keçecek.
«Rusiyelilerniñ çoqusı Cenübiy-Şarqta olğan buhran sebebinden Qırımğa Ukrainadan barmağa istemey», – dey Karakulkin.
O şunı da qayd etti ki, Ukrainadan kelgen yolcularnıñ trenlerden kütleviy sürette endirilgeni qayd etilmey, amma sıñırdan keçkende, bazı qaidelerge uymağa tevsiye etti.
«Yanına em Rusiye, em Ukraina pasportını alğan yolcularnı kimerde trenden tüşüreler. Buña oğramamaq içün özüni yahşı alıp barmağa, tek bir pasport ile seferlerge çıqmağa ve ayınıq olmağa tevsiye etem», – dey Karakulkin.
Evel qayd etilgeni kibi, Moskva-Aqmescit treni Ukraina etrafından avgust 1-den yürecek.
.
