İşğal etilgen Yaltada «Moskva – Yalta – Tranzit» mizah ve estrada açıq festivali çerçivesinde «Yubileynıy» kompleksiniñ yanında «Klara Novikovanıñ şlâpası»na abideniñ açılış tedbiri keçti.
Yatla şeer şurası matbuat hızmetiniñ bergen malümatına köre, abideniñ tantanalı açılışında festival prezidenti Mihail Aşumov, Rusiye halq artisti Klara Novikova, festivalniñ jüri reisi, RSFSR halq artisti, yazıcı Arkadiy Arkanov, Rusiyede nam qazanğan artistler Nikolay Bandurin ve Simon Оsiaşvili, kemaneci Stepan Mezentsev, em de abide müelifleri İgor ve Eleonora Lısenko iştirak ettiler.
«Yañı tunç abideni eykel eserlerniñ soqaqçığında yerleştirdiler. Mında «Mihail Jvanetskiyniñ çantası», «Arkadiy Arkanovnıñ yelegi», «Aleksandr Şirvindtnıñ ülesi», «İosif Kobzonnıñ mikrofonı» bar. Klara Novikovağa bağışlanğan abide üstünde şlâpa ve «Tötâ Sonâ» yazısı olğan küzgü şeklinde yapılğan. – dep bildirdiler şeer şurasında.
«Maña bu pek tesir etti, özümni nasıl alıp barmağa ve ne duymağa da bilmeyim, sağ olğanda, abide qoyuldı. Şlâpa – qadın şeyi dep aytalar, amma erkekler de olarnı taqalar. Erkekler de şlâpa yanında fotoğa tüşkenini ve er vaqıt qadınlar yanında olğanını isteyim», – dedi Klara Novikova.
Evel festival prezidenti Mihail Aşumov «Moskva – Yalta – Tranzit» mizah ve estrada festivali Yaltada yedi yıllıq teneffüsten soñ keçirilecegini bildire edi.
