Link açıqlığı

İşğal etilgen Qırımda yerli «akimiyet», eger de faaliyeti Rusiye qanunlarına ters kelmese, o vaqıt islâm birjasınıñ teşkil ete bilecegini red etmey. Bunı brifing devamında iyül 29 künü Qırımnıñ öz başına ilân etilgen baş naziriniñ keñeşçisi Rustam Temirgaliyev bildirdi, dep haber ete İTAR-TASS.

«Eger de islâm birjasınıñ teşkil olunması federal qanunlarğa ters kelmese, iç bir problem körmeyim. Bu kibi teşebbüs bar, Yaqın Şarqtan buña qol tutacaqlar bar, bu leyha muvafaqiyet ile amelge keçirile bile», – dedi Temirgaliyev.

Neşirniñ malümatına köre, islâm birjası diniy qaidelerge köre çalışa eken. Olarğa binayen, mühtekirlik, paranıñ faizlar boyunca berilmesi, yasaq etilgen mahsulatnıñ (içki, domuz eti ve ilâhre) satuvı yasaq etile. Olar bir sıra ileri memleketlerde yer tapqandır, şu cümleden Londonda bu kibi meydançıq 2010 senesi açıldı. Rusiyede ise bu kibi şey daa yoq.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, Ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.

XS
SM
MD
LG