Link açıqlığı

Aqmescit – Rıqma-rıq tolu salon ve azbarda çapqalağan balalar. Oraza bayramnıñ birinci künü «Zolotoye kоltso» salonında 300-ge yaqın adam toplandı. Mında, halqnıñ medeniyeti ve adetlerini hatırlatqan bayramnı teşkil ettiler. Teşkilâtçılar kelgen adamlarnıñ sayısına şaşıp, daa beş yıl evelsi bu kibi tedbirler ötkerilmegenini qayd eteler.

Tedbir idarecisi Muhammed belli mültfilm qarmanı Ayuvnıñ urbasını kiyip, davetnamelerni tarqta. O, o qadar bala kelecegine iç te ümüt etmeginin ayta. «Bu balalar da, olar filmlerde körgen qaramanlarnen meraqlanmaq kerekler», - dey «Ayuv».

Muhammed tek mültfilmde Ayuvnıñ dostu Maşanıñ kostümini tapalmağanına kederlene. «Men oynağanda, yanıma bir qızçıq kelip: Maşa qayda dep soradı? Maşa ise, yoq. Biz Maşanı kirada tapamadıq», - dey «Ayuv».

Dareciniñ aytqanına köre, soñki vaqıtları balalar çoq toplaşmaylar. «Esasen internet başında oturalar ve çoq dostlaşmaylar. Şimdi ise er kes birlikte oyna, küle, raatlana», - dep qayd etti «Ayuv» - adareci.

Tedbir teşkilâtçısı Zinur Ümerov qayd ekeni kibi, bütün isteklerini yerine ketirip oldılar. «Esas maqsadımız – balalarnı quvandırmaq edi, kelecek yıl da büyük isteknen Oraza bayramnı beklesiñler», -dey Ümerov.

Aytqanına köre, balalarnı qırımtatar medeniyeti ve an-anelerine köre yetiştirmek kerek. «Bayramlar da medeniyetimizniñ bir qısımı. Onıñ içün balalıqtan medeniyetimizge sevgi aşlamalımız. Bayram ne qadar quvanç ketirgenini duysınlar», - dey teşkilâtçı.

Qırım müftisi muavini Esadullah Bairov qayd etkeni kibi, daa beş yıl evelsi bu kibi bayramlar asılında qayd etilmey edi. «Yıl-yıldan daa çoq yaşlar ve üykenler tedbirlerde iştirak etkenlerini köremiz. Bu sene o qadar çoq adam toplaşqanına şaştım. Çünki şeerde diger tedbirler de ötkerile, amma çoqusı mında keldi», - dey Bairov.

Aytqanına köre, bu tedbir pek müim, çünki Oraza bayram qırımtatarlarnıñ eñ eski adetlerinden biri. «Soñki 70-80 yıllar devamında kommunistik qurumı devirinde bu bayram asıl da yoq etilgen edi. Ne biz, ne ana-babalarımız onı balalıqta qayd etmegen ediler. Bügnki künde canlanğanını köremiz», - dey müftiy muavini.

İyül 28-30 künleri Ukraina, bu cümleden Qırım musulmanları eñ büyük islam bayramlarından biri – Oraza bayramnı qayd eteler. Bu künleri yoqsullarını ziyaret etip, musafirlikke barıp, balalarnı bahşışlarnen quvandıralar.

XS
SM
MD
LG