Bugün Qırımdaki yaşayış yarımadanıñ işğaline qol tutqanlar içün bile qıyındır.
Bunı «Den» neşirine qırımtatar milliy Meclis reisi Refat Çubarov bildirdi.
Onıñ fikrince, işğal olunğan Qırımda qalğan insanlarnıñ taqdiri ğayet müimdir.
«Kesen-kes qıymetni kesmeycegim, amma bugün Qırımda yaşağanlar, meydanlarğa Rusiye bayraqları ile çıqqanlar bile, ciddiy problemlerge rastkeldi»,– dey Çubarov.
Onıñ aytqanı kibi, Ukrainada köçip kelgenlerge ve yarımadağa yaşağanlarğa yardım kösterecek Qırım Nazirligi olmaq kerek.
«Qırımdan 7-10 biñ insan çıqtı, olarğa devlet yardımı kerek. Amma eñ müimi – işğal etilgen Qırımda qalğan insanlardır. Menimce, Qırım Nazirligi olmalı. Bu kibi organnıñ teşkil etilmesi qırımlılarnıñ ameliy ve siyasiy suallerini al etmege imkân bermeli. Bu al Ukrainada Qırımda qalğanlarnı tüşüngenini kösterir»,– dedi Çubarov.
İyül 15 künü Yuqarı Şurada Qırım işleri boyunca Nazirlikniñ peyda olmasınıñ kerekligini muzakere ete ediler. Tögerek masa neticesinde bu nazirlikniñ başı vazifesine Refat Çubarov ve qırım Avromaydan iştirakçisi Anatoliy Kovalskiyniñ namzetleri kösterildi.
