Bağçasaray rayon devlet memuriyetiniñ başı İlmi Umerov ukrain devlet hızmetçi antına sadıq qala ve Qırımnıñ Rusiye olmasını istemegenini açıqtan bildire.
Bunı o Qırım.Aqiqat saytına bildirdi.
«Qırımnıñ Rusiye Federatsâisınıñ terkibinde olmasını istemez edim. Bu menim fikrim», – dedi Umerov.
Onıñ sözlerine köre, işğalden soñ ömür ekige bölündi, amma onıñ işinde nasıldır bir müim deñişmeler yoq eken. Faqat, Umerovnıñ degeni kibi, Rusiye qanunlarında iş printsipleri ğayet farqlıdır.
«Rusiye qapalı politsiyalı devlettir. Mında şahsiy fikirniñ olması mümkün degil, onı ses çıqarıp aytıp olamazsıñ, neticede ciddiy aqibetler ola bilir. Biz ise ukrain uquqiy alanında serbestlikke alıştıq»,– dedi o.
Yılnıñ soñuna qadar Qırımda er şey ukrain uquqiy alanında olıp keçecek, amma devlet hızmetçini antını deñiştermege mecbur etecek olsalar, Umerov öz vazifesinden vazgeçmege azır.
«Açıqtan aytam: antnı imzalamağa vaqıt kelgende, o künden men artıq işlemeycem», – dedi Bağçasaray rayonınıñ başı.
O şunı da qayd etti ki, Qırım «baş naziri» Sergey Aksönovnıñ onıñ işine nisbeten nasıldır bir iddiaları yoq, amma öz başına ilân etilgen akimiyet ile körüşüvlerni Umerov körmemezlikke ura.
«Cumhuriyette akimiyet Aksönovnıñ başlığında çalışqanını nazarğa alıp, men, rayon memuriyetiniñ başı olaraq, doğrudan-doğru onıñ ile işleyim. Amma mart 16-dan soñ men bir kere bile «Devlet şurası»nda bulunmadım, – dedi Umerov. – Menim mevamım. Bizni bütün toplaşuvlarğa çağıralar. Men ise barmayım».
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, Ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
