İşğal etilgen Qırımnıñ «Milliy Firqa» ve «Qırım birligi» cemaat teşkilâtlarında Qırım «akimiyeti»niñ organlarına kendi namzetlerini kösterecek ve «qırımtatar halqınıñ şurasını» teşkil etecek olalar.
Bunı Qırım.Aqiqat saytına «Milliy Firqa» keñeşiniñ reisi Enver Kantemir Umerov bildirdi.
Onıñ sözlerine köre, işbu teşkilâtlar işbirlik aqqında añlaşmanı imzaladılar ve saylavlarğa «bir cedvel» boyunca ketecekler.
«Yaqın zamanda teşkilâtlarımıznıñ vekilleri em «Devlet şurası», em «Nazirler şurasında», em de yerli akimiyet organlarında taqdim etilecek»,– dedi Umerov.
O, «qırımtatar halqınıñ şurasını» teşkil etmek planları aqqında da tarif etti. Mında «akimiyet» organları içün tekliflerniñ işlep çıqarıluvı boyunca çalışacaq yarımadanıñ diger teşkilâtları kire bilecek.
Qırımtatar milliy Meclisiniñ yañı birliginde iştirak etüv aqqında Umerov al-azırda Meclis yolbaşçılığı ile işbirlik imkâniyeti baqılmağanını bildirdi, amma ileride regional meclisler ile munasebetlerniñ olmasını red etmey.
Öz nevbetinde qırımtatar milliy areket iştirakçisi, qırımtatar halqınıñ Qurultayınıñ merkeziy saylav komissiya reberi Zair Smedlâyev bu kibi «şuranıñ» peyda oluvını ve onıñ terkibine Meclis temsilcileriniñ kirecegini tenqitke oğrattı.
«Nasıldır bir köy şurası öz terkibine Yuqarı Şura vekilleriniñ qoşulmasını istegeni kibi bir şeydir», – dedi o.
Smedlâyev «Milliy Firqa» USDP cedvelleri boyunca cumhuriyet parlamentine kirmege tırışqanını bildirdi. Amma kirip olamadı, ve bu vaqia, onıñ fikrince, işbu teşkilâtqa yerli eali arasında «qol tutuv» seviyesini kösterdi.
