Qırım Rusiyeli olacaq, dedi Rusiye çetel işler nazirliginiñ başı Sergey Lavrov Moskvada olğan brifingde.
«Siziñ ekinci sualiñiz açıq-aydın olğanını añlaysıñız dep tüşünem. Qırım Rusiye Federatsiyasınıñ qısmıdır, – dedi o, britaniyalı jurnalistniñ sualine cevap berip, – Bu Qırım halqlarınıñ iradesidir ve bu aqta qararlar endi alındı».
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, Ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
Ukraina prezidenti Petro Poroşenko Qırım Ukrainalı olğanını defalarca aytqan edi.
