Link açıqlığı

Rusiye akimiyeti yarımdağa kirsetmegen qırımtatar milliy Meclis reisi Refat Çubarov Qırım musulmanlarını Oraza bayram ile hayırlağanda, işğal etilgen yarımada yaqında insaniyetlikni aşalağanlarnıñ zorbalığından azat etilecegine eminligini bildirdi.

Bunı o Facebook saifesinde bildirdi.

«Bugün işğal etilgen Qırımda yer alğan zorbalıq, duşmanlıq ve qorqu yaqında Qırımğa sürip kirgen ve evimizde insaniyetlik duyğusını aşalağan nizamnı bozğanlar ile birlikte yoq olur», – dep yaza Çubarov.

Öz hayırlav beyanatında Çubarov qırımtatarlar öz diniy bayramını bugün yarımadada olğan kederli şaraitlerde qayd etkeni sebebinden öz açuvını bildirdi.

«Daa bir qaç ay evelsi biz Qırım musulmanları muqaddes Ramadan ayını telâş ve kederni doğurğan şaraitlerde qayd etecegini atta tüşünmedik. Em de Qırım – Vatanımız – Rusiye ve Ukraina halqları arasında dostluqqa ant etken memleket yolbaşçıları tarafından işğal etilecegi de kimseniñ aqlına kelmez edi. Olarnıñ vadeleri yalan olğanı añlaşıldı», – dep yaza Meclis reisi.

Çubarov emin, ecdatlarınıñ ğayreti ile bütün mania ve qıyınlıqlarnı yeñip, Vatanğa qaytqan qırımtatar halqı bugünki kederlerden de keçer.

«Qırım musulmanlarını Oraza Bayram ile hayırlayım! Yüce Rabbimiz er bir musulman ailesine, qomşu ve dostlarımızğа tınçlıq ve muabbetlik eylesin!», – dedi o.

Bazarertesi künü, iyül 28-de, musulmanlar Oraza bayramını qayd eteler.

XS
SM
MD
LG