İyül 28 künü dünya musulmanları muqaddes Oraza bayramnı qayd etecekler.
Qırım paytahtında şu künü çeşit tedbirler keçirilecek. Olarda iştirak etmege bütün istegenler davet etile.
Bunı Qırım haber agentligi bildire.
Böyleliknen, iyül 28 künü muminler Bespalov soqağı, 172a adresi boyunca yerleşken «Zolotoye koltso» salonına davetliler.
Mında olacaq tedbirlerde 12 yaşına qadar balalar iştirak ete bilecekler, musafirlerni çeşit çıqışlar ve ediyeler bekleycek.
Bazarertesi kününiñ esas tedbiri – Zenaat birligi medeniyet evinde keçirilecek bayram namazıdır.
Qırım musulmanları diniy idaresiniñ malümatına köre, bayram namazı er yil Aqmescitte binlerce muminlerni toplay. Qırım paytahtında büyük cami olmağanı sebebinden, namaznı Zenaat birligi medeniyet evinde, meydanlarda ve diger binalarda keçirmege mecburlar.
Bayram namazı saat 7:11 başlanacaq.
Bayramnıñ uçünci künü, iyül 30-da, «İcat» medeniy merkezi tarafından merasim ötkerilecek. Onıñ çerçivesinde sport yarışları keçirilecek, balalarnı tatlılıqlar, büyüklerni ise plâv ile sıylaycaqlar. Tedbir Mokrousov soqağı, 7a, «İcat» medeniy merkezi binasında saat 10:00 başlanacaq.
Oraza Bayram – İslâm taqviminde eki eñ büyük ve müim bayramlarından biridir. Mubarek Ramazan ayı bitkeninen Oraza Bayram qayd etile.
Bayram künü musulmanlar bayram namazına toplaşalar, eñ yahşı urba kiyeler, ananeviy yemekler pişireler, namazdan soñ bayram sofraları donatıla, er kes bir-birini hayırlay, adamlar qomşu, soy-soplarnı ziyaret eteler.
Muminler bir-birini «İd mubarak!» sözleri ile hayırlaylar. Bayram künü ve onıñ arfesinde zakât-al-fitr cıyıla. Toplanılğan para onda muhtac olğanlarğa tarqatıla.
