Link açıqlığı

Qırım memurları yarımadada futbol boyunca dünya çempionatını keçirmege mümkün olğanına inanalar


Qırım memurları 2018 senesi Rusiyede keçirilecek futbol boyunca dünya çempionatında işğal etilgen Qırımnıñ futbol meydanları ile faydalanmağa teklif ettiler, – dep haber ete Qırımnıñ öz başına tayin etilgen akimiyetiniñ «ruporı» «Krıminform» saytı.

Bu gayeni Aqmescitte «Qırım Cumhuriyetiniñ territorial inkişafınıñ içtimaiy-iqtisadiy kelecegi» mevzusında keçirilgen «tögerek masa» devamında Qırımnıñ naqliyat, bağ ve yaqarlıq-energetik kompleksi boyunca «Devlet şurası» daimiy komissiya reisi Gennadiy Babenko seslendirdi.

«Tögerek masa»nıñ iştirakçilerinden birisiniñ çempionatnıñ bir sıra oyunlarını Qırımda keçirmege teklifini izzatlap, Babenko bu ğaye Qırım parlamenti tarafından alğışlanılmaq kerekligi aqqında bildirdi.

«İdmancı ve qoşma meydanlar bar, bu işni keçirmek mümkün», – dedi Babenko.

Futbol boyunca dünya çempionatı 2018 senesi iyün 8-den iyül 8-ne qadar Rusiyede keçirilmeli.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, Ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.

XS
SM
MD
LG