Qırımnıñ öz başına tayin etilgen baş naziri Sergey Aksönov ve yarımada sakinleri içün teşkil etilecek teleköpürniñ merkeziy meydançıqları Aqmescitte ve Kezlev civarındaki Zaozörnoyede olacaq. Yañılıqlardan daa birisi, efirge imkânları sıñırlı olğan insanlarnıñ qoşulması içün yayınnı surdo tercime ile keçirecekler.
Bunı Qırım «akimiyeti»niñ matbuat hızmeti bildire.
«Qırım Cumhuriyeti başına suallerni tek «Qırım» teleradiokompaniyasınıñ studiyasına davet etilgen musafirler ve matduat vastalarınıñ temsilcileri degil de, Sergey Aksönov canlı yayında subetleşecek insanlar da qoya bilecekler», – denile deyanatta.
Teleköpürni iyül 30 künü saat 19:30 «Qırım» telekanalınıñ studiyasında keçirecekler. Mında Aksönov ilk sefer qırımlılarnıñ suallerine canlı yayında cevap berecek.
Suallerni red@c-inform.info adresi boyunca ya da «Krımskoye vremya», «Krımskiye izvestiya », «Krımskaya pravda», « Krımskaya gazeta», «Krımskiy telegraf», «Argumentı i faktı. Krım», «Rossiyskaya Gazeta» neşirlerine, em: «RİA Novosti», «İnterfaks», İTAR-TASS haber agentliklerine yollamağa teklif eteler.
Neticede eñ meraqlı ve aktual sualler Sergey Aksönovğa «Canlı subet» yayınınıñ efirinde berilecek.
«Nazirler şurası»nda Aksönovnıñ qırımlılar ile bu kibi subeti ileride adetiy olacağını bildirdiler.
