Ukraina Milliy bankı aldında cuma künü, iyül 25-de, qırımlı müşteriler qapatılğan esabatları sebebinden numayış keçirdiler.
Qırım.Aqiqat mühbiriniñ bеrgen malümatına köre, numayış iştirakçileri qollarında «Prihvat, qırımlılarnıñ aqçalarını qaytar», «Finansı ve Kredit, depozitni qaytar», «Benâ, meni açuvlatma» kibi plakatlarnı tuta edi.
«Biz Milliy banknı bu işke irişmege çağıramız. Ticariy banklarnı Qırım müşterileri ögünde olğan mecburiyetlerini eda etmege mecbur etsin. Qırımlılar ekinci tür olmağa istemey», – dep tarif etti numayışnıñ teşkilâtçısı Anatoliy Zasoba.
Faaliyetçiniñ sözlerine köre, al-azırda «Privatbank», «Finası i Kredit», «Oşçadbank», «VAB» kibi banklar paralarnı qaytarmağa razı olmay.
Narazılar Milliy banknıñ yanında tahminen 15 daqiqa turdı, soñra olarğa Ukraina Milliy bankınıñ hadimi çıqıp, yolbaşçılıq ile körüşüvge davet etti. Al-azırda muzakereler devam ete.
Mayıs ayında Ukraina Milliy bankı №260 fermanını çıqardı. Oña köre, ukrain bankları Qırımğa öz işini toqtatmaq kerek edi. Bunıñ ile banklarnıñ çoqusı Qırım müşterileriniñ esaplarını açmağa razı olmay. Qırımnıñ sakinleri ve mecburen köçip kelgenlerniñ şikâyetleri eñ çoq «Privatbank»qa ait.
