Link açıqlığı

Kreml siyasetiniñ tarafdarları yarımadada qırımtatarlarnıñ milliy areketini yoq etip olamaycaqlar.

Bunı Qırım.Aqiqatqa qırımtatar milliy Meclis reisiniñ muavini Aslan Ömer Qırımlı bildirdi.

Qırımlı şunı da qayd etti ki, yarımadağa qırımtatarlarnıñ liderlerine – Mustafa Cemilev ve Refat Çubarovğa kiriş yasaq olğanına baqmadan, Meclis – qırımtatarlarnıñ yüksek vekâletli temsiliy-icraiy organı – işlemege devam ete.

«Meclis nice asırlıq tarihına maliktir. Devletlerniñ çoqusında olğan idare organıdır. Onıñ ile küreş ğalebege ketirmez, çünki daima yañı yetekçiler peyda olacaq ve Meclis, iç bir şeyge baqmadan, işlemege ep devam etecek», – dedi o.

Meclis reisi muavininiñ sözlerine köre, qırımtatarlarnı şimdi razı olğan ve olmağanlarğa bölmege tırışalar. Razı olmağanlarğa nisbeten cezalav, qorqutuv ve şantaj qullanılacaq. Boysunmağa ve çeşit emirlerni eda etmege razı olğanlarnı ise «sıylaycaqlar».

«Er alda Mecliste halq tarafından desteklengen maqul qısmı olacaqtır. Qırımıtatar halqını yeñmege imkân yoq. Halqnın iradesine qarşı tayin etilgen namzetlerni ise iç bir zaman ürmet etmeycekler», – dep tüşüne o.

İyül 5 künüHerson vilâyetinde keçirilgen Meclisniñ toplaşuvından qaytqan Refat Çubarovnı Qırımğa kirsetmediler. «Çonğar» kiriş noqtasında Qırım «prokurorı» Natalya Poklonskaya oña «ekstremist faaliyeti» aqqında tenbiyeni seslendirdi.

Bundan da ğayrı, Meclis reisine Qırımğa kirişiniñ 5 yıllıq yasaqlığı aqqında bildirüvni taqdim ettiler.

Bu kibi yasaq qırımtatarlarnıñ milliy yetekçisi Mustafa Cemilevge de berilgen edi.

XS
SM
MD
LG