Qırımda FSB idaresinde aqmescitli rejissör, «Karman» art-merkeziniñ reberi Galina Cikayevanıñ oña Rusiye mahsus hızmetleri tarafından etilgen basım aqqında bildirüvini izaatlamaylar.
«İzaatlar içün ya oña (Cikayevağa – muar.), ya bu bildirüvni aşkâr etken matbuat vastasına muracaat etiñiz», – dediler Qırım.Aqiqatqa hızmetniñ matbuat merkezinde.
«Bu sebepten iç bir izaat olmaycaq», – dep qoştılar matbuat merkezinde.
Qırım.Aqiqat malümatına köre, Galina Cikayeva endi yarımadanı terk etti ve al-azırda qıtaiy Ukrainada buluna.
Aqmescitli rejissör yaqında bildirgeni kibi, o, FSB hadimleri tarafından etilgen basım neticesinde yarımadanı terk etmege mecburdır. Onı terroristik areketlerniñ teşkil etilmesine bağlaylar.
Şu cümleden, Cikayevanı FSB-ge çağırıp, o, «ukrain rejissörı Oleg Sentsovnıñ işi boyunca qabaatlı olğanını» bildirdiler. Onı Qırım FSB hadimleri mayısta yaqaladılar. Al-azırda o, diger yaqalanğan aktörlar ile Rusiye SİZOsında bulunmaqta.
